Nisur nga ngjarjet e fundit kriminale në Kosovë dhe sistemi i dobët i drejtësisë, kreu i qeverisë në Prishtinë, Albin Kurti, duket se ka gjetur zgjidhjen. Sipas Kurtit, Reforma në drejtësi është domosdoshmëri, e vettingu është zgjidhja, duke paralajmëruar të njëjtën reformë që u ndërmor së pari në vendin tonë, si një lloj projekti pilot që do të mund të përdorej më pas në të gjithë rajonin. Ai përmendi se qytetarët janë të pakënaqur me prokurorinë dhe gjyqësorin ndërsa u shpreh se për vendime meritore nga gjykatat duhet të ketë reagim nga shoqëria. Edhe pse me kryeministrin Edi Rama ka patur ‘fërkime’, sidomos së fundi nga situata e krijuar në Veri të Kosovës dhe qëndrimet e Tiranës zyrtare, sërish Kurti mendon se Vettingu i aplikuar në Shqipëri, si pjesë e reformës në drejtësi është zgjidhje.