Më shumë se 50.000 profile të rreme në platformën X, më shumë se 1 milionë postime në gjermanisht; Rusia duket se është përpjekur që përmes një fushate masive të rrisë pakënaqësinë e qytetarëve gjermanë për qeverinë. Ka qenë Ministria e Jashtme e Gjermanisë ajo që ka zbuluar këtë fushatë të madhe disinformuese ruse në internet. Qëllimi i fushatës ka qenë rritja e pakënaqësisë me punën e qeverisë në Berlin dhe minimin e mbështetjes për Ukrainën, raporton "Spiegel".Me porosi të Ministrisë së Jashtme të Gjermanisë ekspertët kanë analizuar me një softuer të posaçëm shërbimin e mesazheve të shkurtra, X dhe kanë gjetur një rrjet të madh profilesh të rreme përdoruesish që shpërndanin përmbajtje në gjuhën gjermane.Në hapësirën kohore nga 20 dhjetor deri në 20 janar ekspertët kanë identifikuar më shumë se 50.000 llogari të rreme në platformën X, që kanë publikuar më shumë se 1 milionë postime në gjuhën gjermane.Në mesazhe ngrihen shpesh akuza se qeveria gjermane injoron popullin e saj për të mbështetur Ukrainën, raporton "Spiegel", duke iu referuar burimeve të besueshme. Ministria e Jashtme po ndjek prej kohësh përmes analistëve të informatikës debatet në mediat sociale mbi temat e politikës së jashtme. Qëllimi është të zbulohet ndikimi nga jashtë. "Disinformimi është kthyer në një faktor global kërcënues", thotë një zëdhënës i Ministrisë së Jashtme për "Spiegel". "Ai përdoret me qëllim nga ata që nuk ndajnë vlerat tona, për të destabilizuar shoqëritë në tërësi." – thotë ai.