Pakistani pritet të ketë akses të zgjeruar në Ngushticën e Hormuzit, pas një marrëveshjeje me Iranin. Lajmi është bërë i ditur nga zëvendëskryeministri dhe njëherazi ministri i Jashtëm, Ishaq Dar, i cili deklaroi se Teherani ka rënë dakord të lejojë kalimin e 20 anijeve të tjera nën flamurin pakistanez. Sipas tij, kjo do të mundësojë kalimin e rreth dy anijeve në ditë përmes një prej korridoreve më të rëndësishme të transportit të energjisë në botë. Megjithatë, autoritetet iraniane nuk kanë konfirmuar ende zyrtarisht këtë marrëveshje. Ngushtica e Hormuzit, përmes së cilës kalon rreth 20% e naftës dhe gazit natyror të lëngshëm global, është prekur ndjeshëm nga tensionet e fundit në rajon. Sipas analizave, trafiku detar ka pësuar një rënie drastike deri në 95% që nga nisja e konfliktit. Zyrtarët pakistanezë e konsiderojnë këtë zhvillim si një sinjal pozitiv për uljen e tensioneve dhe rikthimin e stabilitetit në rajon, ndërsa Islamabadi ka ofruar gjithashtu ndërmjetësimin për bisedime të mundshme mes Iranit dhe Shteteve të Bashkuara.