Trupi i pajetë i një njeriu, identiteti i të cilit ende nuk është përcaktuar u gjet mbrëmjen e së martës në Shën Gjergj, në afërsi të Ulqinit. Drejtoria e Policisë jo zyrtarisht ka thënë për “Vijesti” se rezultatet paraprake të hetimit tregojnë se bëhet fjalë për ish-shefin e policisë së Ulqinit, Rudolf Elezoviç. Nga Policia e Ulqinit thonë se do të bëhet analiza e trupit të pajetë, pas së cilës do të mësohet identiteti dhe shkaku i vdekjes. Zhdukja e Elezoviçit u raportua nga gruaja e tij Marina më 27 maj. Elezoviç shërbeu si shef i policisë së Ulqinit për gati gjashtë vjet, deri në vitin 2014, kur u zëvendësua nga Sead Gjozoviç. Së fundmi ai mbante detyrën e shefit të antidrogës për Ulqinin dhe Tivarin. Sipas informacionit jozyrtar nga policia, Elezoviç dyshohet se ishte përmendur nga të dyshuarit e arrestuar në operacionin “Kurthi” si një person i cili u dha atyre informacion në lidhje me lëvizjen e policisë. Pas atyre deklaratave, hetuesit filluan të kontrollonin nëse këto pretendime ishin të vërteta, megjithatë, Elezoviç u zhduk pasi mori një raport se ai ishte zbuluar.