Donald Trump ka shpërndarë një video të habitshme të krijuar nga AI në platformën e tij Truth Social duke treguar atë që duket të jetë një vizion i Gazës sipas planit të propozuar të tij. Pamjet, të cilat 78-vjeçari i postoi pa koment, tregojnë territorin e shkatërruar nga lufta përpara se të shfaqet një titull: "Gaza 2025... Si do të jetë më pas?" Në video shihet zona e transformuar në një parajsë të Lindjes së Mesme me plazhe ekzotike, rrokaqiej të stilit të Dubait, jahte luksoze dhe njerëz që festojnë. Ka atje edhe një kullë "Trump Gaza" dhe një statujë gjigante, të artë, të presidentit amerikan - me versione në miniaturë në shitje në një dyqan dhuratash e suveniresh. Një fëmijë shfaqet gjithashtu duke ecur në një rrugë, duke mbajtur një tullumbace të madhe në dorë, mbi të cilën është stampuar fotoja e presidentit. Videoja gjithashtu paraqet liderin botëror duke kërcyer, duke bërë banjo dielli dhe duke pirë kokteje pranë një pishine, bashkë me kryeministrin izraelit Benjamin Netanyahu. Edhe Elon Musk shfaqet në filmime disa herë, i ulur në një plazh duke ngrënë, ndërsa kërcimtarët performojnë në rërë. E në përfundim të videos thuhet: "Donald po vjen për t'ju çliruar, duke sjellë dritën për të gjithë, jo më tunele, jo më frikë: Trump Gaza më në fund është këtu. Trump njoftoi planin e tij për përfundimin e luftës midis Izraelit dhe Hamasit - në fillim të këtij viti. Ky plan përfshin zhvendosjen e dy milionë banorëve të Gazës në vendet fqinje arabe dhe zhvillimin e territorit në "Rivierën e Lindjes së Mesme". Ai e përshkroi Gazën si një "vend të rrënuar" ku "praktikisht çdo ndërtesë është e shkatërruar". Plani i Trump shkaktoi reagime të ashpra, me vende si Egjipti, Jordania dhe Arabia Saudite, që e hodhën poshtë menjëherë atë.