Edhe pse mban postin e Sekretarit të Përgjithshëm në Partinë Demokratike zyrtare, të drejtuar nga kryetari me autorizim Enkelejd Alibeaj, kjo nuk e ka penguar Gazment Bardhin që të mos i bashkohet fushatës për kryetarë bashkish. Në një postim të bërë rishtas në rrjetet sociale, Gazment Bardhi kërkon votën vetëm Këshillin Kombëtar, por jo për kandidatin për Tiranën, Roland Bejko. “nga Njesia 1 në Tiranë, për të ftuar çdo qytetar për të votuar Partinë Demokratike në 14 Maj. PD ka paraqitur një listë të shkëlqyer për Këshillin Bashkiak Tiranë. Me votën e demokratëve nuk mund të fuqizohet në Këshillin Bashkiak partia e Ilir Metës dhe asnjë parti tjetër. Kjo do të ishte e dëmshme në afatgjatë për demokratët dhe Shqipërinë. Koha për të qenë të kthjellët!”, shkruan Bardhi, teksa publikon fushatën nga të rinjtë demokratë për shpërndarjen e fletëpalosjeve për qytetarët. Ndërkohë edhe në Vaun e Dejës, Gazment Bardhi është rreshtuar në krah të kandidatit të Berishës, ish-deputetit Zef Hila. Kujtojmë se qëndrimi i Gazment Bardhit është mbajtur edhe në mbledhjet e kryesisë dhe grupit të PD, ku ka kërkuar vazhdimisht daljen me kandidat të përbashkët, ose mos nxjerrjen e kandidatëve për kryetarë por vetëm për anëtar këshilli.