Qeveria e Ekuadorit ka ekstraduar të dielën trafikantin më të madh të drogës, Adolfo Macias, të njohur me nofkën “Fito” në Shtetet e Bashkuara, më shumë se një vit pasi ai u arratis nga një burg i sigurisë së lartë. Arratisja e bosit të krimit nga burgu shkaktoi dhunë të përhapur dhe një operacion të madh ushtarak dhe policor për rimarrjen e tij, duke përfshirë edhe postera qeveritarë që ofronin 1 milion dollarë për informacionin që çonte në arrestimin e tij. Kreu i bandës “Los Choneros”, Macias akuzohet për shpërndarje të kokainës, për komplot dhe dhunë me armë, përfshirë kontrabandë të armëve. Macías, dikur një ish-shofer taksie, pranoi në një gjykatë një javë më parë që të ekstradohet në Shtetet e Bashkuara për t’u përballur me akuzat. Ai është shtetasi i parë i Ekuadorit që ekstradohet nga vendi i tij prej hyrjes në fuqi të ligjit të ri një vit më pare, shkruan the Guardian. Më 25 qershor, Macías u gjet i fshehur në një bunker nën pllakat e dyshemesë në një shtëpi luksoze në portin e peshkimit të Mantës, qendra e operacioneve të Los Choneros. Më shumë se 70% e kokainës së prodhuar në botë kalon nëpër portet e Ekuadorit, sipas të dhënave qeveritare. Në vitin 2024, vendi sekuestroi një sasi rekord prej 294 tonësh drogë, kryesisht kokainë