Vettingu në Polici që në nisje të tij u mendua se do të “eleminonte” ata oficerë, apo efektivë policie që shfaqnin probleme me pasurinë, profesionalizmin, apo pastërtinë e figurës. Por, ata që nuk po e bën vettingu e ka nisur “masivisht” Drejtoria e Sigurimit të Informacionit të Klasifikuar. Sipas ligjit, ky institucion pajis një numër zyrtarësh me certifikatë sigurie, për shkak të përdorimit të informacionit “sekret” dhe “tepër sekret”. Por, në mënyrë krejtësisht habitore për 50 oficerë nuk është rinovuar kjo certifikatë. Burimet thanë se vendimi ekstrem është marrë pas disa informacioneve të mbërritura në rrugë operative se informacionet me karakter sekret kanë dalë jashtë zyrave për të cilat janë dhënë. Përgjigjet negative për pajisjen me certifikatën e sigurisë të zyrtarëve të policisë të niveleve të ndryshme janë dhënë për disa oficerë të antidrogës dhe drejtues të lartë të policisë së Shtetit. Atyre u është hequr përfundimisht e drejta për të lexuar dhe njohur me dokumente sekrete, ku shumica prej tyre janë edhe për persona me apo pa pozitë të lartë shtetërore që ndodhen me shërbim edhe jashtë territorit të Republikës së Shqipërisë. Ndërkohë që edhe në Vettingun policor është angazhuar edhe drejtoria e sigurisë së informacionit të klasifikuar, shërbimi informativ dhe prokuroria, Interpoli dhe Europoli. Efektivi, sipas projektligjit duhet të deklarojë deri edhe ndryshimin e vendbanimeve, ndryshimin e identitetit nëse ka. Po ashtu, do t’i nënshtrohet edhe testit të drogës dhe varësisë nga alkooli, dhe lojërave të fatit. Një pikë e projektligjit parashikon edhe një kontroll nëse efektivi ka qenë apo jo bashkëpunëtor i ish-sigurimit te shtetit. Drejtoria e Sigurimit të Informacionit të Klasifikuar është krijuar pranë Këshillit të Ministrave për të organizuar, drejtuar e kontrolluar masat për ruajtjen, klasifikimin dhe administrimin e informacionit të klasifikuar.