Kur kanë kaluar më shumë se 42 vjet pas shpërthimit vdekjeprurës me bombë në një sinagogë në Paris, gjykatat franceze kanë dënuar një profesor universiteti libanezo-kanadez, si fajtor për kryerjen e sulmit. Gjykatësit u shprehën se ishte pikërisht Hassan Diab, 69 vjeç, i riu që vendosi motoçikletën bombë në Rrugën Kopernik më 3 tetor të vitit 1980. Asokohe u vranë katër persona dhe u plagosën 38 të tjerë nga shpërthimi, ndërsa gjykata i dha profesorit kanadez dënimin me burgim të përjetshëm. Prokurorët argumentuan se përfshirja e Diab ishte përtej dyshimeve dhe e provuar, ndërsa vetë 69-vjeçari refuzoi të marrë pjesë në seancën gjyqësore. Sulmi në rrugën Kopernik ishte i pari që synoi hebrenjtë në Francë që nga Lufta e Dytë Botërore dhe u bë një model për shumë sulme të tjera të ngjashme të lidhura me militantët në Lindjen e Mesme në vitet që pasuan. Diab, 69 vjeç, një libanez me origjinë palestineze që mori shtetësinë kanadeze në 1993 dhe jep mësim si pedagog sociologjie në Otava, u etiketua për herë të parë si i dyshuar në bazë të provave të reja të zbuluara më 1999-ën.