Arrestimi i Xhaferr Deliut ka qenë pikënisja që coi në zbulimin e një tentative për vrasje në qytetin e Elbasanit. Deliu u arrestua në datë 8 tetor me 5 kg heroinë, ndërsa duhet të ishte në masën e sigurisë “arrest shtëpie”. Nga kqyrja e telefonit të tij u zbuluan dy fotot e Elton Kilës (Otit) dhe Abedin Mamës i njohur me nofkën “Dine Çami”. Në fakt, synimi i policisë ishte të zbulonte persona me të cilët bashkëpunonte Deliu për trafikimin e drogës. Nga këto kërkime, policia arriti të gjurmojë dhe të kapë bazën e armatimeve të Luis Gaxhit dhe Rigers Spahiut. Ky i fundit është vëllai i Arjan Spahiut, i ekzekutuar në Belgjikë, ndërsa Gaxhi mik i ngushtë i tij. Sipas policisë, Gaxhi akuzohet për armëmbajtje pa leje, pas zbulimit të një baze armatimi, ndërsa Spahiu dyshohet për përkrahje të Gaxhit dhe “pengim të zbulimit të së vërtetës”, pasi në momentin e arrestimit ai fshiu të gjitha të dhënat në celularin e tij dhe e fiku atë. Gaxhi kishte vetëm pak ditë që kishte mbërritur nga Belgjika ku kishte vuajtur një dënim për drogë. Oti dhe Dine Çami janë të njohur për policinë, pasi sipas dëshmisë së Nuredin Dumanit, i penduar i drejtësisë, ai kishte marrë porosi për të vrarë Elton Kilën, ndërsa Dine Çamin ai e akuzon për përfshirje në disa krime të rënda. Mbi bazën e dëshmisë së Dumanit, Dine Çami është në kërkim në kuadër të operacionit “Plumbi i Artë”. Prokuroria ka dyshime se Elton Kila dhe Dine Çami mund të ishin në shënjestër për t’u vrarë. Kjo sepse të dy janë në konflikt me pjesëtarët e grupit kriminal të drejtuar nga Erjon Alibaj, i cili ndodhet aktualisht në burg për urdhërimin e disa vrasjeve në shenjë hakmarrje për vrasjen e vëllait Endrit Alibej, i njohur si Tarzani, xhaxhait të tij, Arben Dylgjeri dhe një shtetasi turk, në atë që njihet si masakra e Bradasheshit.