Rusia dhe SHBA-ja do të diskutojnë mënyrat për të siguruar transport të sigurtë në Detin e Zi në bisedimet për një zgjidhje të mundshme të luftës në Ukrainë, në qytetin saudit Xhedah gjatë ditëve në vijim, tha Kremlini të enjten. I dërguari i Trump, Steve Ëitkoff në fillim të kësaj jave tha se bisedimet SHBA-Rusi do të zhvillohen të dielën në Jeddah. Por i pyetur nga Reuters, zëdhënësi i Kremlinit Dmitry Peskov tha se ato mund të mbahen në fillim të javës së ardhshme. "Ne presim që negociatat do të vazhdojnë në nivel ekspertësh dhe do të vazhdojnë në ditët në vijim," tha Peskov, duke shtuar se ndihmësi i Kremlinit Yuri Ushakov kishte folur me Mike Ëaltz, këshilltarin e sigurisë kombëtare të SHBA, të mërkurën. Peskov tha se kur Putin dhe Trump folën me telefon të martën, ata kishin diskutuar për "Nismën e Detit të Zi". Turqia dhe Kombet e Bashkuara ndihmuan në ndërmjetësimin e një marrëveshjeje të arritur në korrik 2022 që lejoi eksportin e sigurt të afro 33 milionë tonëve grurë të Ukrainës përmes Detit të Zi, pavarësisht luftës. Rusia u tërhoq nga marrëveshja pas një viti, duke u ankuar se eksportet e saj të ushqimit dhe plehrave u përballën me pengesa serioze. “Ne i kemi plotësuar të gjitha kushtet atëherë, por kushtet në lidhje me ne nuk janë plotësuar”, tha Peskov. Shtëpia e Bardhë, duke folur pas telefonatës mes Trump dhe Putinit, tha se liderët ranë dakord për negociata teknike për zbatimin e një armëpushimi në Detin e Zi.