Në fshatin Borsh, Piqeras dhe Sasaj ka rinisur aksioni nga ajri me dy helikopterë të Forcës Ajrore për të neutralizuar zjarret që kanë kërcënuar banesat dhe bizneset e zonës për shkak të erës së fortë që favorizoi përhapjen e shpejtë të flakëve gjatë orëve të para të mëngjesit të së dielës. Teksa zjarrëfikësit dhe Forcat e Armatosura të stacionuara në Borsh gjatë natës siguruan perimetra sigurie përreth banesave, Policia e shtetit dhe punonjësit e emergjencave civile ndihmuan banorë dhe pushues të evakuohen nga zonat më të rrezikuara, duke shoqëruar drejt sigurisë 40 prej tyre. Zjarrfikësit e Himarës dhe Forcat e Armatosura vijojnë operacionin në terren duke bashkërenduar me ekuipazhet e helikopterëve për të eliminuar çdo rrezik. Në Delvinë, rreth orës 2 pas mesnate është shuar edhe vatra e fundit e zjarrit, duke përmbyllur tragjedinë që zhvendosi 2500 banorë të tre fshatrave, shkrumboi qindra hektarë të mbjella dhe lëndoi 4 persona, njëri prej të cilëve në gjendje më të rënduar shëndetësore me djegie të mëdha në gjoks dhe shpatull.