Një festë në një park ujor në Berkshajer të Mbretërisë së Bashkuar është kthyer në tragjedi. Një vajzë 11-vjeçare ka ndërruar jetë teksa ishte duke u argëtuar në një festë ditëlindje, pjesë e të cilës ishte edhe një kurs lojërash ujore. Vajza e identifikuar si Kyra ka qenë duke luajtur me bashkëmoshatarët e saj për rreth një orë. Ishte nëna e saj e cila kishte vënë re mungesën e gjatë të së bijës edhe është vënë në kërkim për ta gjetur. Për herë të fundit shokët dhe shoqet e saj e kishin parë vajzën mbi sipërfaqen e ujit dhe më pas ajo u ishte zhdukur nga sytë. Ata thanë për median se 11-vjeçarja nuk dinte të notonte. Të paktën 40 veta që ishin të pranishëm, mes të cilëve edhe prindër të fëmijëve që po festonin, u zhytën në ujë, në një mision të vështirë kërkimi prej të paktën 90 minutash, në përpjekje për të gjetur vajzën.