Kokaina me pikënisje Ekuadorin dhe destinacion final Portin e Durrësit ka vënë në lëvizje FBI-në shqiptare. Mësohet se agjentët e Byrosë Kombëtare të Hetimit kanë zbarkuar në Portin e Durrësit, për të zhvilluar kontrolle dhe hetime të imtësishme, pasi dyshohet se një sasi e konsiderueshme lëndësh narkotike fshihet në kontejnerët e ardhur nga Amerika Latine. Kjo lëvizje e BKH-së vjen vetëm pak ditë pasi në Portin e Durrësit mbërritën 31 pako kokainë, me peshë totale 33.5 kilogramë të vendosura në kontejnerë, që përshkruan itinerarin nga Porti Bolivar në Ekuador për të vijuar në Panama, Itali e në fund në Shqipëri. Rastet e përsëritura në trafikimit të lëndëve narkotike në Portin e Durrësit, kanë bërë që autoritetet ligjzbatuese në vend të kthejnë sytë jo vetëm nga kontrolle më të imtësishme të produkteve që kalojnë në Portin e Durrësit, por gjithashtu edhe ndaj punonjësve të policisë. Rasti i para pak ditëve, ishte vetëm një prej rasteve kur skaneri nuk zbulon asnjë gjurmë të lëndëve narkotike në kontenierë ndaj po hetohen punonjësit e policisë dhe roli i tyre në këtë çështje. Mësohet se hetimet përfshijnë edhe përgjime ndaj punonjësve të policisë. Para pak ditësh droga e fshehur në kontenier kaloi lehtësisht në skaner, por më pas u konstatua nga qentë antidrogë.