Seanca parlamentare e kësaj të enjteje pritet të jetë e tensionuar, sepse në rendin e ditës do të hidhet për votim kërkesa e SPAK-ut për dhënien e lejes për arrestimin e ish-zv.kryeministres Belinda Balluku. Pak orë para seancës, Parlamenti ka kaluar në masa të përforcuara sigurie për shkak të protestës së opozitës në orën 10.00. Siç shihet edhe nga pamjet e siguruara nga Top Channel, godina është rrethuar me gardh metalik si masë paraprake për tubimin e Partisë Demokratike. Ligjvënësit socialistë mësohet se do të përpiqen të hyjnë të parët në seancë, për të shmangur kontaktin me protestuesit e opozitës, të cilët janë thirrur të rrethojnë parlamentin. Brenda sallës, mazhoranca dhe opozita pritet të përplasen ashpër mbi kërkesën e SPAK, e cila insiston në heqjen e lirisë së Belinda Ballukut. PS ka deklaruar votën kundër dhënies se autorizimit, ndërsa PD, në mungesë të kartonëve, ka në plan të tregojë forcën si brenda dhe jashtë kuvendit ku ka thirrur në ndihmë mbështetësit e saj. Mesditën e së mërkurës kryetari i partisë demokratike, Sali Berisha mblodhi deputetët opozitarë për të koordinuar aksionin politik jashtë parlamentit.