Një projekt për ndërtimin e një fabrike vaksinash në vendin tonë është diskutuar gjatë vizitës së kryeministrit Edi Rama në Ankara. Rama përmes postimeve në rrjete sociale ka bërë të ditur detaje nga takimet e zhvilluara në Turqi, një ndër tyre me Canturk Alagöz, emër i njohur i shkencës në Truqi dhe pronari i kompanisë së prodhimit të disa lloje vaksinash, dhe distributori i vaksinës Sinovac. “Diskutuam për projektin e ndërtimit të fabrikës së vaksinave në Shqipëri, si pjesë e një qendre ekselence farmaceutike. Teknopark Albania, një qendër e teknologjisë së lartë në periferi të kryeqytetit, për kompanitë HighTech, Start Up-et e kërkimin shkencor, sipas modelit të suksesshëm të jetësuar në Turqi, si katalizator i transformimit ekonomik e social dhe krijimit të vendeve cilësore të punës për të rinjtë”, thuhet në postimin Ramës. Po ashtu në bisedimet dypalëshe mes delegacioneve zyrtare Shqipëri-Turqi, është diskutuar për projektin që mundëson sistemin e kontrollit të territorit të vendit me dronë superinteligjentë, për prodhimin e të dhënave në kohë reale. Ministrat përkatës që shoqëruan kreun e qeverisë në vizitën në Ankara, diskutuan për projeke që lidhen me shëndetësisë, arsimin, strehimin social, kulturën e turizëm, ku u fol edhe për projeke investimesh në hotelerinë me 5 yje në bregdet.