Ndërsa samiti i NATO-s në Uashington po shkon drejt fundit, Ukraina ka marrë premtime të reja për ndihma ushtarake, me akoma më shumë njoftime që priten para se liderët e aleancës të kthehen në shtëpi. Presidenti i SHBA Joe Biden se Uashingtoni, Berlini dhe Bukureshti do të dorëzonin tre bateri shtesë të mbrojtjes ajrore Patriot në Ukrainë. Holanda dhe "partnerët e tjerë" do të kontribuojnë me komponentë për të vënë në funksion baterinë e katërt të re Patriot, tha presidenti, duke shtuar se Italia do të dërgojë një tjetër nga sistemet e saj të mbrojtjes ajrore SAMP-T. "Përveç kësaj, në muajt e ardhshëm, Shtetet e Bashkuara dhe partnerët synojnë t'i ofrojnë Ukrainës dhjetëra sisteme taktike të mbrojtjes ajrore," tha Biden. Kjo do të përfshijë armë kundërajrore Gepard të prodhimit gjerman, sisteme të mbrojtjes ajrore me rreze të mesme NASAMS dhe variante të sistemeve IRIS-T. Sistemet e mbrojtjes ajrore dhe furnizimet me raketa, kanë qenë një prioritet kryesor për Kievin, pasi ai përballet me sulmet e vazhdueshme ruse.