Erërat e fuqishme mesdhetare, kanë shkaktuar përhapjen e shpejt të zjarreve, pranë qytetit jugor të Marsejës në Francë. Deri në mesditën e së mërkurës, raportohet për së paku 22 persona të plagosur. Zjarret kanë dëmtuar disa biznese si dhe detyruan evakuimin e 2.700 turistëve dhe banorëve të rajonit. Rreth 1.800 zjarrfikës, të mbështetur nga aeroplanët dhe helikopterët, luftuan me zjarret gjatë natës së 4 gushtit. Shkaku i zjarreve nuk dihet. Ministri i Brendshëm i Francës, Gerard Darmanin, vizitoi rajonin, derisa ekipet e zjarrëfikësve nga rajonet tjera të Francës, po u dalin në ndihmë autoriteteve lokale për të shuar zjarret. Shqetësim dhe panik ka patur edhe në L’Aquila në itali, për shkak të një zjarri, në dukje të qëllimshëm, që prej pesë ditësh ka përfshirë fushat dhe pyjet rreth qytetit. Flakët i janë afruar shumë zonave të banuara në Monte di Pettino dhe shumë qytetarë dolën në rrugë. Ndërkohë që autoritetet po vijojnë hetimet pas gjetjes së disa shkrepseve që mund të kenë ndezur edhe zjarrin. Rreth 300 zjarrfikës janë angazhuar në përpjekjet për të shuar zjarrin që mbetet jashtë kontrollit.