Dy porte hapësinore të vogla në veriun e largët të Suedisë dhe Norvegjisë po garojnë për të lëshuar satelitët e parë nga Evropa kontinentale në hapësirë, ndërsa rajoni kërkon të reduktojë varësinë e tij nga aktorët amerikanë. Politika "Amerika e Para" e Presidentit të SHBA-së, Donald Trump, dhe lufta në Ukrainë e kanë shtyrë Evropën të tentojë të rrisë aftësitë e saj të pavarura në një sërë fushash, duke përfshirë mbrojtjen dhe operacionet hapësinore. Mes frikës se Elon Musk - aleati i dikurshëm i Trump - mund të kufizojë aksesin e Ukrainës në 7,000 satelitët Starlink të SpaceX që janë jetikë për komunikimet e vendit, Evropa ka nxituar të kërkojë alternativa. Por ka një mal të lartë për të ngjitur. Në 2024, SHBA kreu 154 lëshime pajisjesh në orbitë, ndërsa Evropa vetëm tre. Nga 143 miliardë dollarë investime publike globale në sipërmarrjet hapësinore vitin e kaluar, Evropa zinte vetëm 10%, tregon një studim i BE-së. Trendi drejt satelitëve në orbitën e ulët të Tokës, që janë më të lirë dhe ofrojnë shërbime më të mira, por duhet të vendosen në numër më të madh për të maksimizuar mbulimin - gjithashtu paraqet sfida.