Leku e nisi javën në revansh ndaj euros dhe dollarit. Kursi i Bankës së Shqipërisë tregon se këtë të hënë, monedha europiane u këmbye me 100.78 lekë, ndërsa dollari amerikan me 94.58 lekë. Që nga fillimi i këtij viti, leku është luhatur nga 100.78 në 104.5 lekë për euro. Ecuria e pazakontë e monedhës kombëtare sfidon në këtë mënyrë zhvillimet tipike sezonale të krijuara përgjatë dekadave, pasi muajt e dimrit historikisht kanë qenë periudha presionesh nënçmuese ndaj lekut për shkak të rritjes së importeve, deficitit tregtar dhe tërheqjes së fitimeve nga investimet e huaja të drejtpërdrejta. Faktorët e zhvlerësimit të euros konsiderohen rritja e investimeve të huaja në vend, kryesisht përmes blerjes së pronave të patundshme, por edhe rritja e numrit të turistëve. Të dhënat e Instat tregojnë se në dy muajt e parë të këtij viti, vizitorët e huaj në vend u rritën me 49 për qind, ose në rreth 1.15 milionë vetë.