Euro u zhvlerësua në nivele rekord në nisje të kësaj jave, duke rënë nën kursin e këmbimit që regjistroi në dy javët e fundit të fushatës elektorale. Sipas kursit zyrtar të këmbimit të Bankës së Shqipërisë, euro u këmbye të martën me 110.19 lekë, në rënie me 0.43 pikë të tjera që nga fundi i javës së kaluar. Rënia vjetore e kursit të këmbimit të euros ka arritur tashmë në pothuajse 9 për qind. Banka e Shqipërisë dhe Ministria e Financave kanë arsyetuar zhvlerësimin e monedhës së përbashkët europiane me rritjen e investimeve të huaja dhe sezonin turistik. Agjentët e tregut nga ana tjetër raportojnë se oferta ka ardhur në rritje që prej muajit prill dhe mbetet ende e lartë.