Edison Begaj u qëllua me armë zjarri në oborr të shtëpisë së tij dhe në sy të dy fëmijëve të mitur, të cilët ndodheshin në makinë, ndërsa autoritetet ende nuk kanë asnjë të ndaluar për këtë çështje edhe pse janë shoqëruar 5 persona si të dyshuar. Në pamjet e siguruara nga Top Neës, duken lëvizjet e Edison Begajt dhe autorit. Begaj largohet nga automjeti, ndërsa fëmijët vijojnë të qëndrojnë brenda, e ndërsa flet në telefon rikthehet pranë makinës. Në atë moment i afrohet edhe autori, i cili i del përballë dhe e qëllon disa herë, ndërkohë që fëmijët të tronditur bëjnë disa lëvizje brenda mjetit. Menjëherë pas plagosjes autori shihet duke vrapuar në anën tjetër të banesës, si duket për t’i shpëtuar të shtënave të tjera në drejtim të tij. Begaj ka dalë jashtë rrezikut për jetën, pasi plagët i ka marrë në pjesën e poshtme të trupit. Edison Begaj është një emër i skeduar nga policia e Vlorës edhe më herët, si i përfshirë në trafikun e lëndëve narkotike. Kjo sipas policisë ngre edhe pista e hetimit për ngjarjen, prishje pazaresh apo konflikt i mbartur. Më 20 shkurt të vitit 2008, policia e Vlorës përfundoi operacionin e koduar “Qiriu i ndezur”, i cili i dha fund veprimtarisë 10-vjeçare kriminale të një bande e cila trafikonte drejt Italisë drogë dhe armë. Aksioni i shtrirë në Vlorë, Fier, Kavajë dhe Lushnjë çoi në pranga shtatë persona, mes tyre edhe Edison Begajn, banues në Vlorë.