Mesatarja e temperaturave maksimale gjatë muajit korrik në Kosovë arrin në 31.2 gradë Celsius, sipas të dhënave të kompanisë amerikane të parashikimit të motit Accuëeather. Instituti i Hidrometeorologjisë i Kosovës (IHMK) ka paralajmëruar ndërkohë se ky muaj, bazuar në mesataren e temperaturave maksimale, do të jetë "ndër muajt më të nxehtë të viteve të fundit ". Ministria e Shëndetësisë e Kosovës u ka bërë thirrje qytetarëve që të kenë kujdes gjatë ditëve në vijim, kur instituti hidrometeorologjik thotë se temperaturat mund të arrijnë deri në 40 gradë Celsius. E, gjatë këtyre ditëve të fundit, shumë qytetarë të Kosovës janë drejtuar në pishina e shatërvanë, në përpjekje për t’u freskuar. Këto temperatura vijnë pas dy muajve më të freskët dhe me reshje të shpeshta shiu në Kosovë, të cilat shkaktuan përmbytje në disa qytete, me dëme më të mëdha në Pejë. Këto përmbytje shkaktuan vdekjen e një nëne dhe fëmijës së saj pesëvjecar, ndërsa stuhitë i morën jetën shtatë personave javën e kaluar në Ballkan dhe lënduan shumë të tjerë. I gjithë rajoni i Ballkanit perëndimor në fakt është goditur nga temperatura të larta. Mali i Zi, Shqipëria dhe Maqedonia e Veriut janë përballur me temperatura edhe më të larta se në Kosovë. Instituti hidrometeorologjik sidoqoftë parashikon se temperaturat ekstreme do të vazhdojnë edhe për disa ditë, por do të bien nën 30 gradë celcius në fund të javës. Për kosovën, kjo nuk është hera e parë që përballet me një valë të tillë të nxehti. Vitet 2007, 2012 dhe 2015, kanë qenë sipas të dhënave, më të nxehtë se ky i sivjetshmi.