Një ngarkesë prej 20 kilogramë kokainë e pastër e cila nëse do dilte në treg do kapte vlerën e 4 milionë eurove, është sekuestruar në Foggia të Italisë. Droga ishte vendosur në një makinë me targa gjermane që drejtohej nga një 40-vjeçar shqiptar. Gjatë një kontrollit në makinë, policia zbuloi drogën e ndarë në 18 pako. Nervozizmi i shqiptarit në momentin e kontrollit nga reparti i Guardia di Finanzës shtyu autoritetet policore të kryejnë një kontroll më të hollësishëm mbi automjetin me ndihmën dhe të qenve antidrogë. Mediat italiane shkruajnë se në fund të bagazhit që komandohej me një sistem me telekomandë, fshiheshin pakot me kokainë. Ndaj 40-vjeçarit shqiptar rëndon akuza e trafikut të paligjshëm të drogës, sipas kodit penal Italian.