Qetësia relative e Sirisë nuk zgjati shumë: Shpërthimi i dhunës sektare në jug të vendit i ka kushtuar jetën të paktën 30 personave, ndërsa autoritetet u detyruan të dërgonin forca ushtarake për të vendosur nën kontroll situatën. Dhjetëra persona u plagosën gjithashtu. Dhuna u regjistrua mes fiseve beduine sunite dhe luftëtarëve nga pakica fetare Druze në qytetin Sueida. Ministria e Brendshme e Sirisë flet për të paktën 30 të vdekur, ndërsa Vëzhguesi Sirian për të Drejtat e Njeriut - grup që monitoron luftën - raportoi se numri i viktimave mund të jetë gati 40. Përplasjet mes grupeve të ndryshme minoritare morën një hov të ri pas shembjes së regjimit të presidentit Bashar al-Assad, në muajin dhjetor. Për vendosjen e rregullit brenda vendit tashmë është duke punuar një qeveri islamike. Besimi Druze është një degë e Islamit Shiit, që ka komunitete të konsiderueshme edhe në Liban, Jordani dhe Izrael. Nën regjimin e Asadit, shumë prej tyre ishin besnikë të qetë ndaj shtetit, me shpresën se do t’iu ofronte mbrojtje gjatë luftës civile 13-vjeçare. Vendet perëndimore vazhdojnë sakaq të bëjnë përpjekje për të rivendosur marrëdhëniet me Sirinë. Këtë muaj, Shtetet e Bashkuara hoqën nga lista e tyre e organizatave të huaja terroriste grupin Hayat Tahrir al-Sham (HTS) - që ka marrë tashmë kontrollin e vendit.