Një infektim me koronavirus në të shkuarën nuk i mbron të rinjtë nga riinfektimi. Ky është përfundimi në të cilin ka dalë një studim i fundit sipas të cilit edhe me antitrupa nga një infektim i mëparshëm, marrja e një vaksine mbetet mënyra kryesore për të parandaluar riinfektimin me koronavirus dhe për të reduktuar shkallën e transmetimit. Kërkuesit kanë studiuar më shumë se 3 mijë pjesëtarë të shëndetshëm të trupave të marinës amerikane, të moshës nga 18 deri në 20 vjec, dhe gjetën se 10 për qind e tyre, që e kishin marrë më herët koronavirusin, ishin infektuar sërish. Ndërkohë që gjysma ishin infektuar për të parën herë mes majit dhe dhjetorit të vitit të shkuar. Edhe pse studimi është bërë tek persona të rinj, të shëndetshëm dhe rekrutë ushtrie, kërkuesit besojnë se rreziku i riifektimit është i njëjtë tek pjesa dërrmuese e të rinjve. “Imuniteti, thonë kërkuesit nuk ëhstë i garantuar nga një infektim i shkuar dhe vaksinimi mund të ofrojë mbrojtjen shtesë që nevojitet për ata që e kanë kaluar covid 19.Studimi u publikua në revistën The Lancet dhe tregonte po ashtu edhe se pjesa më e madhe e rasteve të reja, 84 për qind e atyre që ishin infektuar me covid në të shkuarën, ishin asimptomatikë. Ndërsa 68 për qind e atyre që janë prekur nga koronavirusi për të parën herë, nuk kishin simptoma.