Gjykata e Kukësit ka vendosur masën e sigurisë “arrest me burg” për 58-vjeçarin Imer Shpata, i cili përballet me akuza për dhunë në familje dhe armëmbajtje pa leje. Autoritetet kanë dyshime të forta se ai mund të jetë i përfshirë edhe në zhdukjen e bashkëshortes së tij, Nadire Shpata, 48 vjeçe, e cila nuk ka kontaktuar nga familjarët që prej datës 22 korrik. Hetimet janë intensifikuar pas zbulimit të telefonit të saj në makinën e bashkëshortit, gjë që për prokurorinë përbën një provë të rëndësishme për një krim të mundshëm brenda familjes. Kërkimet për trupin e saj janë përqendruar në zonat malore të Tropojës, ku dyshohet se mund të jetë fshehur. Imer Shpata nuk është një emër i panjohur për autoritetet, në vitin 2023 është arrestuar nga policia e Tropojës për dhunë ndaj bashkëshortes. Megjithatë, ai mohon akuzat, duke pretenduar se bashkëshortja e tij është larguar vullnetarisht nga shtëpia.