Një ngjarje e rëndë u regjistrua në Pogradec këtë të hënë ku një grua 52-vjeçare, e identifikuar si Kozeta Teço, u gjet e pajetë në banesën e saj e përfshirë nga flakët. Nga ekzaminimi paraprak i trupit të viktimës janë konstatuar shenja dhune, gjë që përforcon pistën e një ngjarjeje kriminale. Sipas policisë dyshohet se zjarri në banesën e viktimës është shkaktuar nga një shtetas. Ilirjan Selmani, i dyshuari kryesor i vrasjes është shoqëruar nga policia në vendin e ngjarjes për të kryer një eksperiment hetimor. Burime jozyrtare bëjnë me dije se ai kishte një lidhje intime me viktimën. Hetuesit dyshojnë se Selmani fillimisht e ka vrarë 52-vjeçaren, më pas ka pastruar vendin e ngjarjes duke përdorur peshqirë dhe peceta, të cilat janë gjetur me gjak në një kosh mbeturinash pranë pallatit, dhe në fund ka ndezur disa vatra zjarri në banesë për të zhdukur provat. Pamjet filmike nga bizneset përballë banesës ndihmuan në identifikimin e tij, dhe më pas ai u shoqërua nga komisariati në vendin e krimit për të kryer një eksperiment hetimor. Pavarësisht provave, Selmani ka mohuar përfshirjen në ngjarje.