Efektivi i patrullave “Shqiponja” do të përballet me gjykatën për vlerësimin e masës së sigurisë për një akuzë të rëndë, atë të vrasjes. Pas dëshmisë dhe hetimeve që janë kryer nga Prokuroria, por edhe Shërbimi për Cështjet e Brendshme dhe Ankesave, efektivi me inicialet N.H është zbardhur edhe krimi i vrasjes së 25 vjecarit Klodian Rasha. Sipas nenit 83 të Kodit Penal vrasja e kryer në kushtet e kapërcimit të kufijve të mbrojtjes së nevojshme dënohet me burgim deri në shtatë vjet. Kaq rrezikon efektivi i policisë, ndaj të cilit është ngritur akuza. Ngjarja ndodhi të martën në rrugën “Dritan Hoxha”, kur polici i arrestur dhe një koleg i tij kanë konstatuar gjatë patrullimit një shtetas, i cili sillej dhe kryente veprime të dyshimta, çka bëri shkak që Patrulla të kryente verifikimin e shtetasit. Pas thirrjes së Policisë për të ndaluar, i riu nuk i është bindur thirrjes së efektivit dhe ka tentuar të largohet për t’i ikur policisë, e cila është vënë në ndjekje të tij nëpër rrugica. Gjatë hetimeve paraprake, si kqyrja e vendit të ngjarjes ku ka gjetur vdekjen shtetasi Klodian Rasha, grupi hetimor nën drejtimin e Prokurorit, administroi pamjet filmike të subjekteve private pranë vendit të ngjarjes. Nga hetimet paraprake është konkluduar se dyshohet se veprimet e punonjësit të Policisë bien në kundërshim me procedurat standarde të përdorimit të armëve të zjarrit dhe se ai nuk ka qenë në kushtet e përcaktuara në ligjin për përdorimin e armës së zjarrit, duke kapërcyer kufijtë e mbrojtjes së nevojshme.