Gjermania tha të premten se do t'i dorëzojë Ukrainës dy sisteme Patriot, pasi arriti një marrëveshje me SHBA-në, sipas së cilës Berlini do të jetë i pari në radhë për të marrë sistemet më të fundit në këmbim. Falë angazhimit të SHBA-së, "Gjermania fillimisht mund ta mbështesë Ukrainën me lëshues raketash dhe më pas me komponentë shtesë të sistemit Patriot", tha Ministri gjerman i Mbrojtjes Boris Pistorius në një deklaratë. Bundesëehr-i fillimisht do të dorëzojë në Ukrainë lëshues shtesë raketash Patriot në ditët në vijim, të ndjekura nga komponentë shtesë të sistemit që do të dorëzohen brenda dy ose tre muajsh. Në këmbim, Berlini do të marrë sisteme të reja Patriot, për të cilat po siguron financimin, nga Shtetet e Bashkuara me një ritëm të përshpejtuar. Nevojat e Ukrainës për mbrojtje ajrore janë bërë më urgjente, pasi Rusia ka intensifikuar sulmet e saj ajrore në të gjithë vendin këtë verë, dhe sistemet Patriot kanë rezultuar efektive në shkatërrimin e raketave balistike ruse. Gjermania tashmë ka dorëzuar tre nga sistemet e saj Patriot në Ukrainë dhe tha të premten se dërgimi i sistemeve shtesë nuk do të ndikojë në kontributin e saj në aleancën mbrojtëse të NATO-s.