Federata e Shoqatave Greke në Ukrainë ka lëshuar një deklaratë lidhur me incidentin e së dielës ku u raportua se u vranë dy shtetas grekë dhe u plagosën dy të tjerë nga forcat e armatosura ukrainase në fshatin Granitne. Në një postim në Facebook, shoqata shkruan se një prej viktimave është ukrainas me prejardhje greke dhe se viktima tjetër nuk ka kombësi helene. Më tej, shoqata shton gjithashtu se ngjarja ka ndodhur në një bar kafe dhe nuk ka të bëjë aspak me motive politike të konfliktit Rusi-Ukrainë. Ajo kërkon që media helene të verifikojë ngjarjen dhe të mos shpërndajë informacione false. Një ditë më parë u raportua se dy grekë në Ukrainë u vranë dhe dy persona të tjerë u plagosën nga forcat e armatosura ukrainase pranë kufirit me Rusinë. Ngjarja, u aludua se mund të kishte edhe motive politike, por zyrtarët thanë se gjithcka ka ndodhur për shkak se ushtarët ukrainas ishin të dehur. Ministri i Jashtëm grek Nikos Dendias kërkoi madje shpjegime për ngjarjen nga shteti ukrainas. U mendua madje edhe se këto vrasje mund të ishin shkëndijat e para e nisjes së konfliktit të shumëparalajmëruar mes Rusisë dhe Ukrainës, pasi dy viktimat u raportuan paraprakisht se ishin ushtarë.