Tre persona janë vënë në pranga, pasi janë kapur në flagrancë duke futur mallra kontrabandë në Shqipëri. Në pranga janë vënë përgjegjësi i pikës doganore të Gorricës, një doganier dhe drejtuesi i një mjeti. Bëhet me dije se përgjegjësi i pikës doganore Julian Hanelli dhe punonjësi i doganës Petrika Mano janë arrestuar për favorizim të kontrabandës. Policia kufitare njofton se këta dy shtetas nuk kanë ushtruar kontroll ndaj një mjeti tip Sharon, i cili sillte produkte ushqimore nga Maqedonia e Veriut. Drejtuesi i mjetit Vasil Nasto, i cili po transportonte sasinë e mallit kontrabande u ndalua nga policia ne aksin rrugor Gorricë -Zvezdë. Tre të arrestuarit po merren në pyetje në ambientet e Drejtorisë së Policisë së Korçës. Ende nuk dihet sasia e mallrave që u lejuan të hyjnë në territorin tonë nga dogana e Gorricës. Policia vijon hetimet.