Një zjarr në një depo nafte në qytetin Azov në rajonin jugor të Rostovit në Rusi vazhdon të mbetet i ndezur prej më shumë se 24 orësh, thanë të mërkurën shërbimet lokale të emergjencës. Disa cisterna të depozitimit të naftës janë përfshirë nga flakët pas një sulmi me dronë, mëngjesin e të martës, me një burim të inteligjencës ukrainase që tha se ishte kryer nga Shërbimi i Sigurisë së Ukrainës (SBU). “Zjarri në distriktin Azov është lokalizuar në një sipërfaqe prej 3200 metrash katrorë në orën 05:30 të mëngjesit të së martës”, tha shërbimi i urgjencave në kanalin Telegram të mërkurën. Burimi i tha agjencisë së lajmeve Reuters se sulmi goditi depot Azovskaya dhe Azovnefteprodukt që kanë gjithsej 22 rezervuarë karburanti. Kievi ka thënë shpesh se shënjestrimi i infrastrukturës energjetike, ushtarake dhe të transportit, të Rusisë dëmton përpjekjet ushtarake të Moskës. Qyteti i Azov ndodhet në lumin Don dhe është rreth 16 km larg nga Deti Azov.