Që prej përhapjes së pandemisë së koronavirusit në mbarë botën, u ndalua që të mbahen organizime ku mund të mblidhen shumë njerëz. Si pasojë, këngëtarët në mbarë vendin e kanë patur të pamundur që të organizonin koncerte, madje kanë anuluar edhe ato që i kishin planifikuar m kohë. Por këngëtarja e famshme me origjinë shqiptare ka zbuluar se ka një surprizë për gjithë fansat e saj. Dua Lipa do të mbajë një koncert virtual në fund të muajit nëntor, një mënyrë kjo që të qëndrojë pranë atyre që pëlqejnë muzikën e saj. Lajmin e bukur, Lipa e ka dhënë përmes një postimi në profilin e saj në “Instagram”. “Studio 2054” do të titullohet koncerti i saj virtual, ku sigurisht që artistja do të këndojë live. Madje jo vetëm kaq, pasi pritet që Dua të ndërrojë kostumet dhe skenat ku do të performojë. Këngëtarja ka vendosur që gjatë performancave të saj të shoqërohet edhe nga disa muzikantë.