Rusia ose operativët e saj kanë dërguar dronë zbulues mbi rrugët e transportit në Gjermaninë lindore të përdorura nga Shtetet e Bashkuara dhe aleatët për të dërguar ngarkesa ushtarake në Ukrainë, raportoi The Neë York Times të enjten, duke cituar zyrtarë amerikanë dhe perëndimorë. Sipas zyrtarëve, dronët po mbledhin informacione që mund të përdoren për të mbështetur fushatën e sabotimit të Kremlinit dhe për të ndihmuar forcat ruse në fushën e betejës. Aktiviteti ka ngritur shqetësime në rritje mes zyrtarëve ushtarakë amerikanë dhe evropianë në lidhje me aftësinë e Moskës për të minuar linjat perëndimore të furnizimit. Autoritetet amerikane dhe gjermane kanë diskutuar tashmë operacionet e sabotimit rus, duke përfshirë informacionet që çuan në arrestimin në maj të tre shtetasve ukrainas të akuzuar për komplot me Rusinë. Fushata e sabotimit është lidhur më parë me zjarre në depo në Mbretërinë e Bashkuar, një sulm ndaj një dige në Norvegji, përpjekje për të prerë kabllot nënujore në Detin Baltik dhe veprime të tjera shkatërruese. Shërbimet perëndimore të inteligjencës vënë re se, pasi arritën kulmin vitin e kaluar, numri i incidenteve të sabotimit rus në Evropë ka rënë ndjeshëm në vitin 2025. Analistët ia atribuojnë këtë ulje masave të shtuara të sigurisë dhe përpjekjeve më të forta parandaluese nga agjencitë e inteligjencës amerikane dhe evropiane. Aktivitetin më të fundit të dronëve rusë mbi gjermani e konfirmuan edhe zyrtarët amerikanë por ata thanë se nuk kanë qenë në gjendje të gjurmojnë origjinën. Ata besojnë se fluturimet kryhen drejtpërdrejt nga operativë rusë ose nga individë që punojnë për shërbimet e inteligjencës ruse. Mbikqyrja me dronë ka shumë gjasa të lidhet me inteligjencën në fushën e betejës dhe synon t’i japë ushtrisë ruse një kuptim më të qartë se me cfarë armësh mund të përballet në luftën me ukrainën, dhe kur do të vijnë ato.