Presidenti kinez Xi Jinping i tha kryeministrit indian Narendra Modi se “zgjedhja e duhur” për Kinën dhe Indinë është të jenë miq dhe partnerë, teksa dy vendet më të populluara në botë po afrohen mes tyre në një moment tensionesh të përbashkëta me SHBA-në. Dy liderët shtrënguan duart përpara kamerave, ndërsa diskutimet erdhën në një kohë kur të dy vendet përballen me tarifa të rënda amerikane dhe kritika perëndimore për lidhjet e tyre me Rusinë. “Bota sot po kalon transformime që ndodhin një herë në një shekull,” tha Xi. “Është zgjedhja e duhur që dy vendet tona të jenë fqinje e partnere të mira drejt sukseseve të përbashkëta dhe dragoi e elefanti të vallëzojnë me njëri-tjetrin” shtoi ai. Marrëdhëniet mes Kinës dhe Indisë janë karakterizuar nga armiqësi të thella për ndikim në rajon. Dy vendet përplasen për kufirin në Himalaje, por edhe për mbështetjen e rivalëve të tyre në rajon.