Shqipëria është e vendosur për të çrrënjosur korrupsionin dhe të forcojë shtetin e së drejtës. Kjo nuk është një fjali standarde, sikurse thuhet në shumicën e takimeve zyrtare, apo konferencave ndërkombëtare, por një detyrë tashmë, e vendosur si kusht për hapjen e negociatave dhe mbështetjen amerikane. Një gjë e tillë u deklaruar edhe nga Ministrja e Drejtësisë në Sesionin e Posaçëm të Asamblesë së Përgjithshme mbi “Sfidat dhe Masat për Parandalimin dhe Luftimin e Korrupsionit” në mbledhjen e Orhanizatës së Kombeve të Bashkuara. “është bërë funksionale edhe një arkitekturë e tërë institucionale në luftën kundër korrupsionit dhe krimit të organizuar, duke përfshirë një Prokurori të Posaçme për Luftën kundër Korrupsionit dhe Krimit të Organizuar, gjykatat e posaçme, si dhe Byronë Kombëtare të Hetimit. Një arkitekturë e tillë institucionale mundëson kanalizimin e përpjekjeve ndëshkuese, duke përjashtuar gjyqtarët dhe prokurorët e korruptuar nga sistemi dhe duke siguruar hetimin dhe ndëshkimin e praktikave të tyre korruptive.” Ministrja e Drejtësisë u shpreh se duke u bazuar në rekomandimet e Grecos dhe Moneyvalit është arritur progres i rëndësishëm.