Kamboxhia do të nominojë Presidentin amerikan Donald Trump për Çmimin Nobel për Paqen, tha zëvendëskryeministri i saj të premten, pas ndërhyrjes së tij të drejtpërdrejtë në ndalimin e konfliktit të fundit kufitar të vendit të Azisë Juglindore me Tajlandën. Duke folur me gazetarët në kryeqytetin e Kamboxhias, Phnom Penh, zëvendëskryeministri falënderoi Trump për ndihmën në vendosjen e paqes dhe tha se ai meritonte të nominohej për çmimin që është edhe vlerësimi ndërkombëtar i profilit më të lartë që i jepet një individi ose organizate që konsiderohet se ka bërë shumë për të "forcuar miqësinë mes kombeve". Pakistani tha në qershor se do ta rekomandonte Trumpin për Çmimin Nobel për Paqen për angazhimin e tij në zgjidhjen e konfliktit me Indinë, dhe kryeministri izraelit Benjamin Netanyahu tha muajin e kaluar se e kishte nominuar Trumpin për çmimin prestigjioz po ashtu. Ishte një telefonatë nga Presidenti amerikan javën e kaluar ajo që theu një bllokadë në përpjekjet për t'i dhënë fund luftimeve më të ashpra mes Tajlandës dhe Kamboxhias në më shumë se një dekadë, duke çuar në një armëpushim të negociuar në Malajzi, raportoi Reuters. Pas njoftimit të armëpushimit, zëdhënësja e Shtëpisë së Bardhë, Karoline Leavitt, tha në një postim në X se Trump e bëri të mundur paqen. "Jepini Çmimin Nobel për Paqen!", tha ajo. Të paktën 43 persona janë vrarë në përleshjet intensive, të cilat zgjatën pesë ditë dhe zhvendosën më shumë se 300,000 njerëz në të dyja anët e kufirit.