Llavë, tym dhe gazra helmues kanë vazhduar të dalin nga vullkani në Las Palmas gjatë natës, duke bërë që hi toksik të bjerë si shi mbi ishull. Banorët lokalë janë këshilluar të lajnë perimet dhe veshjet dhe të evitojnë gëlltitjen e hirit ndërkohë që shpërthimi nuk tregon shenja ngadalësimi edhe kur kanë kaluar pesë ditë nga fillimi i tij. Një lumë llave i dalë nga krateri vazhdon udhëtimin e ngadaltë drejt oqeanit duke djegur cdo shtëpi apo fermë që i del përpara. Ndërkohë, pasojat do të ndjehen edhe shumë larg, me një re të madhe gazi të dioksidit të squfurit që do të mbulojë evropën të enjten dhe me gjasë do të sjellë mbi të shi acidik. E njëjta re do të mbërrijë edhe britaninë e madhe deri të dielën me vëzhguesit që thonë se në atë pikë, shanset që ajo të prekë sistemin e motit do të jenë shumë të vogla. Vullkanologët që po monitorojnë shpërthimin paralajmëruan të mërkurën se vullkani kishte hyrë në një fazë të re shpërthyese dhe se me gjasa do të nxirrte akoma më shumë hi dhe tym. E kjo u pa gjatë natës së shkuar, me pamjet që tregonin llavën që ngrihej për qindra metra në qiell e më pas, lëshohej poshtë faqes së kraterit si një lumë i tërbuar. Të dhënat nga satelitët e motit të BE tregojnë progresin e llavës që tashmë ndodhet pak km larg nga oqeani. Shkenvëtarët kishin parashikuar se llava do të arrinte detin të martën duke prodhuar një re gazi toksik në momentin e përzierjes me ujin e detit. Por tani ata mendojnë se llava edhe mund të mos arrijë deri në det, por të vazhdojë të përhapet në tokë duke shkatërruar më shumë shtëpi dhe toka bujqësore nga sa ishte menduar.