Top News- Djemtë e lindur në 1997, nga krimi në krim!/ Duan hak për viktimat e vitit të ‘mbrapshtë’

Kur Shqipëria ishte në luftë, ata që sot janë rritur dhe po bëhen pjesë e krimeve të rënda me motive hakmarrje, ose nuk kishin ardhur ende në jetë, ose ishin shumë të vegjël për të kuptuar se çfarë po ndodhte dhe me kë po luftonin shqiptarët. Por, pas shumë vitesh, ata ndoshta janë rritur me mungesën e njerëzve të afërm të familjes në shtëpi. Dhe padyshim që kanë mësuar, sesi ata janë larguar nga kjo jetë. Padyshim, që u është treguar e vërteta e vrasjeve mes shqiptarësh e mes bandash, edhe për firmat piramidale që prodhuan gjithë këtë. Por, sot, ata që atëherë nuk kishin lindur, ose ishin të mitur janë kthyer në protagonistët e krimeve të rënda, që zënë fill atëherë. Djali i një babai të vrarë në atë kohë nuk mund të përtypë "turpin" e shokëve, teksa çdo ditë mbase i thonë se filani i ka vrarë të atin. Ekspertë të policisë thonë se ky fenomen për fat të keq është gjithnjë e në rritje.