Marrëveshja tregtare SHBA-BE, e arritur në një sallë vallëzimi në resortin e golfit të Donald Trump në Skoci të dielën, është kritikuar nga kryeministri i Francës dhe udhëheqësit e biznesit në Gjermani. Marrëveshja, e cila do të vendosë tarifa prej 15% për pothuajse të gjitha eksportet evropiane në SHBA, përfshirë makinat, i jep fund kërcënimit të vendosjes së tarifave ndëshkuese prej 30% të importit nga 1 gushti që kishte lëshuar më herët Trump, por është shumë larg nga tarifa zero e importit dhe eksportit që BE ofroi fillimisht. Kjo gjithashtu do të thotë që eksportuesit evropianë në SHBA do të përballen me më shumë se trefishin e tarifës mesatare prej 4.8% që është aktualisht në fuqi, me negociatat që do të vazhdojnë për çelikun, i cili ende përballet me një tarifë prej 50%, aviacionin dhe pikëpyetjet e mëdha mbi pengesat e ardhshme për eksportet farmaceutike. Kryeministri i Francës, François Bayrou, tha se Evropa i ishte nënshtruar SHBA-së, në një "ditë të errët" për unionin. Kancelari gjerman, Friedrich Merz, e përshëndeti marrëveshjen, duke thënë se ajo shmangu "përshkallëzimin e panevojshëm në marrëdhëniet tregtare transatlantike" dhe shmangu një luftë tregtare potencialisht të dëmshme. Eksportuesit gjermanë ishin më pak entuziastë. Federata e fuqishme e grupeve industriale BDI tha se marrëveshja do të kishte "pasoja të konsiderueshme negative". Është gjithashtu e qartë se tarifa amerikane prej 15% për pjesët e automjeteve do të vendosë një barrë mbi kompanitë gjermane të automjeteve në mes të transformimit të tyre, duke goditur shitjet dhe fitimet. Tregjet evropiane të aksioneve ndërkohë arritën nivelin më të lartë katërmujor në fillim të tregtimit të hënën, mes lehtësimit që ishte arritur një marrëveshje.