Kryeministri Rama dhe kryedemokrati Basha ishin këtë të diel në Elbasan, për të uruar ditën e verës, edhe pse si rrallë herë ka ndodhur një përplasje mes militantëve partiakë. Pasi kanë marrë informacion për prezencën e Ramës në qytet, një grup militantësh nga Partia Demokratike që prisnin liderin Basha krijuan incidente, madje duke thirrur Rama ik në momentin që kryeministri kishte zgjedhur një xhiro në bulevardin kryesor të qytetit. Në të njëjtin vend ka kaluar 5 minuta më pas edhe Basha, që është mbështetur nga përkrahës të tij. Ndonëse ishte një vizitë në ditë feste, Basha e ka cilësuar vizitën e tij në Elbasan një marshim që do refektohet edhe në 25 prill. Nga ana tjetër Policia pas incidentit ka ndërhyrë dhe shoqëruar disa persona. Situata ka qenë e tensionuar për shumë minuta, ndërsa binte në sy edher mungesa e marrjes së masave për covid 19. Gjithashtu Policia ka shtuar patrullat për monitorimin e situatës në territor, për të mos lejuar organizimin e grumbullimeve në vende të mbyllura dhe të hapura, gjatë ditës së sotme dhe gjatë të hënës që është pushim zyrtar. Po kështu do të monitorohet mbajtja e detyruar e barrierës mbrojtëse (maskës) nga të gjithë qytetarët, gjatë qëndrimit apo lëvizjes në ambientet jashtë shtëpisë. Nga policia do të shtohen kontrollet në ambientet e lokaleve, bareve, restoranteve, duke njoftuar pronarët dhe administratorët për të mos organizuar apo lejuar grumbullime masive të qytetarëve gjatë Ditës së Verës. Policia parashikon ndërhyrjen për ndalimin e grumbullimeve më shumë se 10 persona në vende të mbyllura apo të hapura, për festime. Do të ndalohet lëvizja e qytetarëve përtej orarit të lejuar si dhe aktiviteti i bareve dhe restoranteve përtej orës 20:00.