Kontrolle të shtuara për monitorimin e zbatimit të masave kufizuese anticovid, me qëllim parandalimin e përhapjes së infeksionit COVID-19. Policia ka shtuar patrullat për monitorimin e situatës në territor, për të mos lejuar organizimin e grumbullimeve në vende të mbyllura dhe të hapura, gjatë ditës së sotme dhe gjatë të hënës që është pushim zyrtar. Po kështu do të monitorohet mbajtja e detyruar e barrierës mbrojtëse (maskës) nga të gjithë qytetarët, gjatë qëndrimit apo lëvizjes në ambientet jashtë shtëpisë. Nga policia do të shtohen kontrollet në ambientet e lokaleve, bareve, restoranteve, duke njoftuar pronarët dhe administratorët për të mos organizuar apo lejuar grumbullime masive të qytetarëve gjatë Ditës së Verës. Policia parashikon ndërhyrjen për ndalimin e grumbullimeve më shumë se 10 persona në vende të mbyllura apo të hapura, për festime. Do të ndalohet lëvizja e qytetarëve përtej orarit të lejuar si dhe aktiviteti i bareve dhe restoranteve përtej orës 20:00.