Një zjarr i madh ka përfshirë vendgrumbullimin e mbetjeve në lagjen Myq-Mamëz të Kukësit gjatë orëve të para të mëngjesit të së hënës. Ekipet e zjarrfikësve kanë ndërhyrë menjëherë dhe kanë punuar pandërprerë gjatë natës për të vënë flakët nën kontroll, por vatra e zjarrit vijon të jetë aktive. Tymi i dendur është përhapur në drejtim të qytetit dhe fshatrave përreth, duke shkaktuar shqetësim të madh mes banorëve për shkak të ndotjes së ajrit. Kjo është hera e tretë brenda tre viteve që ndodh një zjarr i tillë në këtë vendgrumbullim, duke thelluar dyshimet mbi mënyrën e menaxhimit dhe kontrollit të mbetjeve në zonë. Flakët janë përhapur me shpejtësi në një sipërfaqe të gjerë, çka ka shtuar dyshimet për zjarrvënie të qëllimshme. Pritet të nisë një hetim për të zbardhur shkaqet e incidentit.