Presidenti i Republikës priti deri në fund seancën që zgjati më shumë se 5 orë për të bërë reagimin e parë mbi raportin e komisionit hetimor, por mbi të gjitha për shkarkimit, që ka vetëm karakter politik dhe aspak juridik. Përmes zëdhënësit të tij, Tedi Blushi, Presidenti i ka zeruar totalisht 104 votat e deputetëve, duke e konsideruar vendimin e tyre antikushtetues. Megjithëse ndër shkeljet, të cilat u hetuan nga anëtarët e komisionit, ishin edhe deklarata e njëanshme përsa i përket procesit zgjedhor të 25 Prillit, zëdhënësi Tedi Blushi nuk ka ngurruar të drejtojë sërish gishtin nga kryeministri Rama, lidhur me zgjedhjet e përgjithshme parlamentare. Sipas tij, nuk kishte asnjë surprizë nga ai Kuvend, ndërsa Ramën e cilëson si tregtari i kufijve të Shqipërisë dhe të Kosovës. Madje, për deputetët që votuan pro shkarkimit, këshilltari mediatik i Metës thotë se veç pensionit të përjetshëm, ata siguruan edhe një palë pushime qyl, duke mos kursyer ironinë. Në qëndrimin e tij Tedi Blushi pati edhe një vërejtje, ose këshillë për gazetarët, duke kërkuar prej tyre të hetojnë krimet zgjedhore, që sipas tij tjetërsuan votat e 25 prillit.