Në administratën shtetërore janë shtuar rreth 10 mijë vende punë në raport me tremujorin e parë, dhe për këtë Presidenti Meta bën përgjegjës kryeministrin Edi Rama, duke shtuar se qëllimi i këtyre punësimeve është “përdorim i shtetit” për zgjedhjet parlamentare. Në një postim në rrjetin social pPresidenti Ilir Meta ka ngritur shqetësimin se pak javë para zgjedhjeve parlamentare, në administratën publike janë duke u krijuar, sipas tij, vende të reja fiktive të punës në kundërshtim me ligjin, “vetëm për qëllime elektorale, në këmbim të votave më 25 prill”. Nga burimet administrative mbi punësimin në tremujorin e fundit të vitit 2020, shkruan Meta, numri i të punësuarve në administratën shtetërore arriti në 182.5 mijë persona, duke u shtuar me rreth 10 mijë vende, në raport me tremujorin e mëparshëm. Punësimet e përkohshme fiktive elektorale kanë për qëllim trajtimin preferencial të simpatizantëve dhe anëtarëve të forumeve politike të mazhorancës aktuale, me qëllim angazhimin e administratës dhe burimeve shtetërore në funksion të zgjedhjeve, ka vijuar presidenti. Përdorimi i shtetit për qëllime elektorale është një tjetër dëshmi serioze dhe skandaloze e degradimit dhe e kompromentimit të reformës në administratën publike nga ana e Kryeministrit ende në detyrë”, mbyll postimin Presidenti i vendit, Ilir Meta.