Agjencia ndërkombëtare e vlerësimit Standard & Poors, ka paraqitur panoramën makrokekonomike të vendit tonë, ku ka ruajtur vlerësimin B+ , pra me perspektivë të qëndrueshme. Agjencia parashikon se rritja ekonomike do të ngadalësohet deri në fund të këtij viti. S&P vlerëson se në ndryshim nga vendet e tjera të rajonit, ekspozimi tregtar dhe financiar i Shqipërisë ndaj Rusisë dhe Ukrainës është i papërfillshëm, gjë që kufizon ndikimin e konfliktit në ekonomi. ‘Standard and Poors’ vlerëson se prioritet për vendin duhet të jetë stabilizimi i borxhit publik dhe ulja e nivelit të tij në vitet në vijim, duke pasur parasysh respektimin e rregullave fiskale siç përcaktohet nga Ligji Organik i Buxhetit. Këto rregulla fiskalë kërkojnë që qeveria të arrijë një bilanc primar pozitiv nga viti 2024 e në vijim dhe një raport borxhi ndaj Produktit të Brendshëm Bruto në rënie të vazhdueshme deri sa ai të arrijë dhe qëndrojë nën nivelin 45 përqind të PBB. Agjensia vëren se inflacioni në Shqipëri është rritur në nivelin më të lartë që nga viti 1999, duke arritur në 7.4% në qershor. Agjensia pret që inflacioni të mbetet i lartë, por pritet të kthehet gradualisht rreth nivelit të targetuar prej 3%, kjo si për shkak të shtrëngimit të politikës monetare ashtu edhe të presioneve të dobësuara të çmimeve nga jashtë. Ndërkohë, stabiliteti i fortë i lekut ka ulur presionet mbi financat publike dhe sistemin bankar.