Pak kohë më parë gazeta e parë e pavarur në vend ‘Koha Jonë’ festoi 30 vjetorin e themelimit të saj. Janë të paktën 3 shoqata gazetarësh që i kanë drejtuar tre kërkesa të ndryshme presidentit Ilir Meta, ku i kanë kërkuar që në këtë përvjetor të dekorojë gazetën ‘Koha jonë’ për rolin që ka pasur në këto 3 dekada si misionare e fjalës së lirë. Por ndërsa nga presidenca dekoratat janë derdhur lumë për emra të njohur e të panjohur, me kontribute apo edhe pa asnjë kontribut për vendin e shoqërinë, dekreti për të dekoruar ‘Koha jonë” mungoi. Përmes një editoriali në formën e një letre të hapur për Metën, botuesi i gazetës “Koha Jonë” Nikollë Lesi, i është drejtuar presidentit të vendit, duke renditur arsyet se përse e priste këtë vlerësim nga ana e tij. “Të të mbajnë me vite me çështje penale vetëm për artikujt dhe të hedhin shtëpinë në erë me dinamit pikërisht nga SHIK-u (pushteti) e ku vetëm Zoti të shpëton fëmijët dhe bashkëshorten, mbetet sakrificë që bën për lirinë e fjalës. Dhe këto mi bëri pushteti i kohës, mua. Të të djegë pushteti redaksinë e gazetës më të madhe në Shqipëri në të gjitha kohërat shqiptare që kur ka lindur fjala dhe të ringrihesh nga hiri, është sakrificë.Të rezistosh 30 vite si gazetë që punon për lirinë e fjalës dhe shtyp të lirë, patjetër që quhet SAKRIFICË”, thuhet ne editorialin e Lesit. Më tej botuesi i njohur vë në dukje se dekorata është vlerësim dhe respekt që shteti ka ndaj një individi apo grupimi të caktuar. “Nuk është lekë, euro! Eshtë respekt! Eshtë fakt publik se mbi 80 për qind e analistëve dhe drejtuesve kryesorë në mediat e shkruara dhe audiovizive kanë dalë nga dyert e KOHA JONE. E përtypa dhe gëlltita që të mos flas publikisht, por edhe nuk mund të hesht, aq me tepër kur flitet për KOHA JONE, e cila ka bërë histori në këtë vend. Natyrisht që ju kuptoj në luftën Tuaj për mbrojtjen e Kushtetutës dhe të jap të drejtë. Dhe jam solidar në këtë drejtim, me Ju. Sikurse nuk jam aspak dakord me sulmet ndaj sekretarit amerikan të shtetit”, thuhet në letrën e Nikollë Lesit drejtuar Presidnetit të vendit Ilir Meta.