Pas dëbimit të pesë anëtarëve të Ministrisë së Brendshme të Serbisë nga autoritetet e Kosovës, me arsyetimin se “përbëjnë kërcënim për sigurinë kombëtare”, ka reaguar BE. Zëdhënësi I Bashkimit Europian, në një reagim me shkrim për Radio Evropa e Lirë, tha se masat për heqje të shtetësisë apo dëbimit duhet të jenë në përputhje me Konventën Evropiane për të Drejtat e Njeriut. Sipas zëdhënësit të BE, masat në rastin e pjesëtarëve të Ministrisë së Brendshme të Serbisë që jetojnë në Kosovë, është dashur të jenë masat e fundit dhe të ndërmerren vetëm pas një procesi ligjor. “Po i ndjekim me kujdes arrestimet dhe dëbimet. I kemi kërkuar autoriteteve të Kosovës të sigurojnë një proces të drejtë, të respektojnë standardet e të drejtave themelore dhe të garantojnë mjete juridike për personat e prekur”, thuhej në përgjigje. Sakaq, ministri I Punëve të Brendshme të Kosovës, Xhelal Sveçla, ka bërë të ditur se vendimin për heqjen e shtetësisë e ka marrë mbi bazën e Ligjit për shtetësinë, akteve nënligjore dhe rekomandimeve të institucioneve përkatëse.