Amnistia fiskale është një nismë ligjore e ndërmarrë nga qeveria shqiptare, që konsiston në legalizimin e pasurive të padeklaruara të emigrantëve, rivlerësimin e pasqyrave financiare si dhe mbledhjen e tatimeve nga deklarimet. Krahas amnistisë fiskale, drafti parashikon edhe një amnisti të plotë penale duke i përjashtuar nga hetimi tatimor dhe procedimi penal për fshehje pasurie. Qeveria parashikon në draftin e saj, që aktualisht është në konsultim publik, se amnistia fiskale do të zgjasë për 9 muaj që nga momenti i miratimit. Nga amnistia fiskale dhe penale përfitojnë më së shumti emigrantët shqiptarë, bizneset dhe të huajt që janë rezidentë dhe tatim-pagues në Shqipëri. Eksperti i ekonomisë, Rezart Prifti ka folur shpesh në lidhje me amnistinë fiskale. Ai e ka ironizuar nismën si pa kuptim, pasi një person që pretendon të bëjë punë krahu në Angli, nuk mund të kursejë 2 milionë euro.